ဣသရေလနိုင်ငံတော်

ဒါဝိဒ်မင်းကြီး

အကြီးမြတ်ဆုံးလို့ ပြောကောင်းပြောလို့ရတဲ့ ဣသရေလနိုင်ငံတော်ရဲ့ နောက်တက်တဲ့ဘုရင်ဟာ မထင်ထားတဲ့ရင်းမြစ်ကနေ ဆင်းသက်လာသူဖြစ်ပါတယ်။ ဒါဝိဒ်ဟာ ဗက်လင်လို့ခေါ်တဲ့ အလွန်ဝေးလံခေါင်သီတဲ့ မြို့မှာ နေထိုင်သူရဲ့ အငယ်ဆုံးသား (အစဉ်အလာအတိုင်းဆို အကြီးဆုံးသားက ဘုရင်ဖြစ်တာပါ) ဖြစ်ပါတယ်။ (ဒီမြို့နာမည်ကို ကြားဖူးသလိုရှိပါသလား။) ယေရှုကို ဒါဝိဒ်ရဲ့ မျိုးဆက် (သူ့သားစဉ်မြေးဆက်) ကနေ မွေးဖွားလာခဲ့တာဖြစ်ပါတယ်။ ဒီလောကမှာ သူ့အလိုတော်ကို ဆောင်ရွက်ရာမှာ ကူညီပေးဖို့ ဘုရားသခင်ရွေးချယ်ခဲ့တဲ့ အရင်လူများအားလုံးနည်းတူ ဒါဝိဒ်ဟာ မပြီးပြည့်စုံပါဘူး။ ဘုရင်မင်းမြတ်အဖြစ် သူစိုးစံခဲ့စဉ်မှာ အလွန်ကြီးလေးတဲ့ အပြစ်တွေကို ကျူးလွန်ခဲ့ပါတယ်။

သို့ဖြစ်သည့်တိုင် ဓမ္မရာဇဝင် ပထမစောင် ၁၃:၁၄ မှာ ဒါဝိဒ်ဟာ ဘုရားသခင်ရဲ့ စိတ်နှလုံးတော်နှင့်အညီ ကျင့်ကြံသူဖြစ်ကြောင်း ဘုရားသခင်က ပရောဖက်ရှမွေလကို ပြောခဲ့ပါတယ်။

နာခံမှုမရှိသော နိုင်ငံတော်

ဒါဝိဒ်ရဲ့သား ရှောလမုန်က ဘုရင်အဖြစ် ဆက်ခံခဲ့ပါတယ်။ ရှောလမုန်ဟာ ပညာအရမ်းတတ်ပြီး ပညာရှိသောကြောင့် လူသိများပါတယ်။ ခမည်းတော်ဒါဝိဒ်က အရင်စီစဉ်ကြံဆခဲ့တဲ့ ခမ်းနားထည်ဝါတဲ့ ဗိမာန်တော် တည်ဆောက်မှုကြီးကို အပြီးသတ်ဖို့ ဣသရေလနိုင်ငံတော်ကို ဦးဆောင်ခဲ့တဲ့ ဘုရင်တစ်ပါးလည်းဖြစ်ပါတယ်။ ရှောလမုန်ကို အနည်းဆုံး ဓမ္မဟောင်းကျမ်းက စာအုပ်နှစ်အုပ်ဖြစ်တဲ့ ရှောလမုန်သီချင်း (အချစ်ကဗျာ) နှင့် ဒေသနာကျမ်း ကို ရေးသားခဲ့ကြောင်း အသိအမှတ်ပြုခဲ့ပါတယ်။

ဘုရားသခင်ရဲ့ သူ့လူတွေအတွက် အဦးဆုံးအမိန့်အမှာစကားကတော့ တခြားဘုရားတွေမရှိခြင်းပင် ဖြစ်ပါတယ်။ ကံမကောင်းစွာနဲ့ပဲ ဣသရေလနိုင်ငံတော်အနားမှာ ဘုရားနဲ့ရုပ်တုအမျိုးမျိုးကို ကိုးကွယ်တဲ့ မျိုးနွယ်စုတွေ ပြည့်လို့နေပါတယ်။ ရှောလမုန်ဟာ ဗိမာန်တော်တည်ဆောက်ရာမှာ ကူညီနိုင်စေဖို့အတွက် ဒီနိုင်ငံခြားသားအများအပြားကို ဣသရေလပြည်ထဲ ခေါ်ဆောင်လာခဲ့ပါတယ်။ အလုပ်သမားတွေက သူတို့နှင့်အတူ သူတို့ကိုးကွယ်တဲ့ ရုပ်တုတွေကို ယူဆောင်လာကြပါတယ်။ ကျွန်ုပ်တို့ဘ၀မှာ အားလုံးသိကြတဲ့အတိုင်း ကိုယ်နဲ့တူညီမှုမရှိတဲ့သူတွေ၊ ကိုယ်ယုံကြည်တဲ့အရာကို မယုံကြည်တဲ့သူတွေနားမှာ အမြဲရှိနေတဲ့အခါ သူတို့ ယုံကြည်တဲ့အရာတွေနဲ့ အလေ့အကျင့်တချို့ကို စတင်လက်ခံကျင့်သုံးချင်စိတ်ကို လွန်ဆန်ရခက်ပါတယ်၊ အထူးသဖြင့် ကိုယ့်ယုံကြည်ချက်က အားနည်းတဲ့အခါ ပိုဆိုးပါတယ်။ ဣသရေလနိုင်ငံတော်မှာ ဖြစ်ခဲ့တာလည်း ဒီလိုတစ်ပုံစံတည်းပါပဲ။

ရှောလမုန်က အဘက်ဘက်မှာ ကြီးမြတ်တဲ့ ဘုရင်ဖြစ်ပေမဲ့ သူ့အုပ်ချုပ်မှုပုံစံက မကြာခဏဆိုသလို ကြမ်းတမ်းခဲ့ပါတယ်။ ဗိမာန်တော်ဆောက်ဖို့အပြင် သူ့အတွက် ဇိမ်ကျကျ နန်းတော်တစ်ခုဆောက်ဖို့အတွက် ပြည်သူတွေဆီကနေ ကြီးလေးတဲ့ အခွန်တွေ ကောက်ပါတယ်။ ဒီအကြောင်း အပါအဝင် တခြားအကြောင်းတွေကြောင့် ဣသရေလနိုင်ငံတော်က နှစ်နိုင်ငံကွဲသွားခဲ့ပါတယ် (တောင်ဘက်မှာ ယုဒ၊ မြောက်ဘက်မှာ ဣသရေလ)။

ဘုရားသခင်သည် ပရောဖက်များမှတဆင့် သတိပေးချက်များ ပေးပို့လေသည်

ဣသရေလနိုင်ငံတော်ကို ဘုရားသခင်က သူ့လူမျိုးအဖြစ် ရွေးချယ်ခဲ့ပေမဲ့ (တရားဟောရာကျမ်း ၇:၇-၉) ဣသရေလလူမျိုးတွေဟာ ၎င်းတို့နားမှာ နေထိုင်ကြတဲ့ လူမျိုးတွေရဲ့ ရုပ်တုတွေကို အကြိမ်ကြိမ် အဖန်ဖန် ပြောင်းကိုးကွယ်ကြပါတယ်။ မကြာခဏဆိုသလို ဒီရုပ်တုကိုးကွယ်မှုမှာ မွေးကင်းစကလေးကို ယဇ်ပူဇော်မှုနှင့် လိင်ပိုင်းဆိုင်ရာ အကျင့်ယိုယွင်းမှုလို အလေ့အကျင့်တွေ ပါဝင်ပါတယ်၊ ဘုရားသခင်အနေနဲ့ သူ့လူတွေက ဒီလိုလုပ်ရပ်မျိုးတွေ လုပ်နေတာကို ဘယ်လို့မှ သည်းမခံနိုင်ခဲ့ပါဘူး။

ဘုရားသခင်ဟာ လူတွေရဲ့ မနာခံမှုကြောင့် ဆိုးရွားတဲ့အကျိုးဆက်တွေ ရှိလာမှာဖြစ်ကြောင်းကို သတိပေးဖို့ လူတွေထံ ပရောဖက်တွေကို ထပ်ခါထပ်ခါ စေလွှတ်ခဲ့ပါတယ်။ ဓမ္မဟောင်းကျမ်းရဲ့ နောက်ဆုံးအပိုင်းမှာ ဘုရားသခင်က သူ့ပရောဖက်တွေကို ပြောဖို့ မှုတ်သွင်းထားတဲ့ စကားတွေကို မှတ်တမ်းတင်ထားပါတယ်။ ဘုရားသခင်ဟာ သူ့ပရောဖက်တွေကနေတစ်ဆင့် ပြုလုပ်ခဲ့တဲ့ ဣသရေလလူမျိုးတွေရဲ့ ရှုံးနိမ့်မှုနှင့် ပြည်နှင်ဒဏ်ခံရမှုအတွက်

ခန့်မှန်းချက်တိုင်းဟာ အတည်ဖြစ်လာခဲ့ပါတယ်။ ဣသရေလဘုရင်တွေအတွက် ကျွန်ုပ်တို့ပြုလုပ်ထားတဲ့ ဇယားနဲ့ ပုံစံတူဇယားကို ပရောဖက်တွေရဲ့ အရေးအသားတွေကို အစဉ်အတိုင်း သိရှိနိုင်စေဖို့ အောက်မှာဖော်ပြထားပါတယ်။

ဓမ္မရာဇဝင် ပထမစောင်နှင့် ဒုတိယစောင်၊ ဓမ္မရာဇဝင် တတိယစောင်နှင့် စတုတ္ထစောင်၊ ရာဇဝင်ချုပ် ပထမစောင်နှင့် ဒုတိယစောင် အတွင်းဖြစ်ပျက်ခဲ့တဲ့ အဖြစ်အပျက်တွေဟာ ဣသရေလလူတို့ကို ပရောဖက်တွေ သတိပေးတဲ့ ဖြစ်ရပ်တွေ ဖြစ်ပါတယ်။

ရှုံးနိမ့်ခဲ့သော နိုင်ငံတော်

ဣသရေလလူမျိုးတွေဟာ နှစ်ငါးဆယ်လောက် ပြည်နှင်ဒဏ်ခံရပြီးနောက်မှာ သူတို့မွေးရပ်မြေကို ပြန်လာခွင့်ရပေမယ့် ပြန်သွားခဲ့တဲ့သူတွေကို လက်ချိုးရေလို့ရပါတယ်။ ဣသရေလနိုင်ငံတော်ရဲ့ ထွန်းတောက်တဲ့ ခေတ်ကာလက ပြီးဆုံးသွားခဲ့ပါပြီ။ ဗိမာန်တော်ကို လုယူဖျက်ဆီးခဲ့ကြပြီး ဣသရေလလူမျိုးတွေက သူတို့ကိုယ်သူတို့ ဘယ်တော့မှ အုပ်စိုးတော့မှာ မဟုတ်ပါဘူး။ ၁၉၄၈ ခုနှစ်၊ ဒုတိယကမ္ဘာစစ်အပြီးမှာ အစ္စရေးနိုင်ငံသစ်ကို မတည်ထောင်ခင်အထိ သူတို့မြေဟာ အင်ပါယာတစ်ခုမဟုတ်တစ်ခုရဲ့ အုပ်ချုပ်မှုအောက်မှာ ရှိနေမှာဖြစ်ပါတယ်။

ဓမ္မဟောင်းကျမ်းရဲ့ နောက်ဆုံးစာအုပ် သုံးအုပ်ဖြစ်တဲ့ ဟဂဂဲအနာဂတ္တိကျမ်း၊ ဇာခရိအနာဂတ္တိကျမ်းနှင့် မာလခိအနာဂတ္တိကျမ်း တို့ကို ဂျူးလူမျိုးတွေအနေနဲ့ ပြည်နှင်ဒဏ်ခံရပြီးနောက်မှာ ၎င်းတို့ရဲ့ ဘုရားသခင်အပေါ် ယခင်က ယုံကြည်မှုကို ပြန်လည်အသက်သွင်းအောင်နှင့် ကိုယ်တော့်အပေါ် ကိုးကွယ်မှု (ဂျူးဘာသာတရား) ကို သစ္စာရှိရှိ ပြန်ခံယူအောင် တိုက်တွန်းဖို့ ရေးသားခဲ့ခြင်းဖြစ်ပါတယ်။

မှာယွင်းတဲ့ စတင်မှု အနည်းငယ်ပြီးနောက်မှာ ၎င်းတို့ဟာ ဗိမာန်တော်အသစ်ကို တည်ဆောက်နိုင်ခဲ့ကြပါတယ်။ ဗိမာန်တော်အသစ်ဟာ ရှောလမုန်မင်းကြီးလက်ထက်က တည်ဆောက်ခဲ့တဲ့ ယခင်ခမ်းနားတဲ့ ဗိမာန်တော်ရဲ့ အရိပ်သာသာဖြစ်ပေမဲ့ ဒါဟာ ၎င်းတို့အနေနဲ့ နောက်ဆုံးမှာ စစ်မှန်တဲ့ တစ်ဆူတည်းသော ဘုရားသခင်ကို တစ်ဖန်ပြန်လည် ကိုးကွယ်နိုင်စေမယ့် မွေးရပ်မြေက နေရာတစ်ခုဖြစ်ပါတယ်။

ပရောဖက်တွေက ဣသရေလနိုင်ငံတော် ကျဆုံးခြင်းကို ဟောကိန်းထုတ်နေချိန်မှာတောင် သူတို့ဟောကိန်းတွေမှာ ဘုရားသခင်နှင့် သူ့လူတွေကြား ပဋိညာဉ်သစ်ဖွဲ့မယ့် ကယ်တင်ရှင်မေရှိယနဲ့ပတ်သက်တဲ့ ပရောဖက်ပြုချက်တွေ ရောထွေးပါဝင်နေခဲ့ပါတယ်။ (ဟေရှာယကျမ်း ၅၃း၅၅)

ဘုရားသခင်ဟာ ရှုံးနိမ့်သူတွေကို အဆိုးဆုံးအခြေအနေရောက်နေသည့်တိုင် အနာဂတ်ဟာ သူ့ထက်မှာ ရှိနေဆဲဖြစ်ကြောင်းနဲ့ သူဟာ သူ့ရဲ့ အပြောင်မြောက်ဆုံး ဖန်ဆင်းမှုဖြစ်တဲ့ လူသားမျိုးနွယ်နဲ့ ဆက်ဆံရေးတစ်ခု တည်ဆောင်ဖို့ လိုလားဆဲဖြစ်ကြောင်း ယုံကြည်ဖို့ ပြောဆိုခဲ့ပါတယ်။

သခင်ယေရှုမကြွခင်နှင့် ကြွပြီးနောက် အချိန်ကာလ

သမိုင်းအလုံးစုံကို သခင်ယေရှုကို မမွေးဖွားခင်နှင့် မွေးဖွားပြီးနောက်ဆိုပြီး နှစ်ပိုင်းခွဲထားပါတယ်။ ကျွန်ုပ်တို့ရဲ့ ပြက္ခဒိန်ပေါ်က ခုနှစ်ဟာ သခင်ယေရှုကို မွေးဖွားတဲ့အချိန်ကစတွက်တဲ့ ခုနှစ်အရေအတွက် ဖြစ်ပါတယ်။ ယနေ့ခေတ်မှာ ကျွန်ုပ်တို့ဟာ ဓမ္မဟောင်းကျမ်းနဲ့ အစောပိုင်းကာလက ရက်စွဲတွေကို "ယေရှင်ခရစ်မတိုင်မီ (Before Christ)" လို့ အဓိပ္ပာယ်သက်ရောက်တဲ့ အတိုကောက် B.C. ဆိုပြီး သုံးနှုန်းပါတယ်။ သခင်ယေရှုကို

မွေးဖွားပြီးနောက်ပိုင်းကာလက ရက်စွဲတွေကို "ကျွန်ုပ်တို့သခင်၏ ခုနှစ်တွင် (In the year of our Lord)" လို့ အဓိပ္ပာယ်သက်ရောက်တဲ့ လက်တင်စကား "Anno Domini" ရဲ့ အတိုကောက် "A.D" အဖြစ် သုံးနှုန်းပါတယ်။

ယေရှုဟာ မေရှိယဖြစ်ကြောင်း၊ ဘုရားသခင်ရဲ့ သားတော်ဖြစ်ကြောင်းကို မယုံကြည်တဲ့၊ သခင့်ကို ကျွန်ုပ်တို့ရဲ့ ရက်စွဲသတ်မှတ်တဲ့စနစ်ကနေ ထုတ်ပယ်လိုတဲ့ လူတချို့ရှိပါတယ်။ ဒီလူတွေဟာ "ခေတ်သက္ကရာဇ်မတိုင်ခင် (Before the Common Era)" လို့ အဓိပ္ပာယ်သက်ရောက်တဲ့ အတိုကောက် "B.C.E." ကို စတင်အသုံးပြုလာကြပါတယ်။ ဒါပေမဲ့ ကျွန်ုပ်တို့ရဲ့ “ခေတ်သက္ကရာဇ်” ကို သခင်ယေရှုရဲ့ ကမ္ဘာမြေပေါ်မှာ ရှိနေခဲ့တဲ့အချိန်အဖြစ် အဓိပ္ပာယ်ဖွင့်ဆိုထားတာကြောင့် အားလုံးအတူတူပဲဖြစ်ပါတယ်။ ကျွန်ုပ်တို့ အရင်ကပြောခဲ့သလိုပဲ သမိုင်းအလုံးစုံကို သခင်ယေရှုကို မမွေးဖွားခင်နှင့် မွေးဖွားပြီးနောက်ဆိုပြီး နှစ်ပိုင်းခွဲထားတာ ဖြစ်ပါတယ်။

ပြည်နှင်ဒဏ်ခံရပြီးနောက် ဂျူးဘာသာတရား (ဘုရားသခင်ကို ကိုးကွယ်ယုံကြည်မှု)

ဂျူးလူမျိုးတွေလို့လည်းခေါ်တဲ့ ဣသရေလလူမျိုးတွေရဲ့ ကိုးကွယ်ယုံကြည်မှုမှာ သူတို့အပြစ်တွေကို ခွင့်လွှတ်ပေးဖို့အတွက် ဘုရားသခင်ထံ တိရစ္ဆာန်ယဇ်ပူဇော်မှုတွေ အမြဲပါဝင်ခဲ့ပါတယ်။ ဘုရားသခင်က အာဒံနဲ့ဧဝကို သူတို့ရဲ့အပြစ်အတွက် အသေခံရမယ်လို့ ပြောခဲ့တာကို မှတ်မိသေးလား။ ဂျူးလူမျိုးတွေအတွက် ဘုရားသခင်က ညွှန်ကြားထားသလို

တိရစ္ဆာန်တစ်ကောင်ကို ယဇ်ပူဇော်ခြင်းဟာ သူတို့ရဲ့အပြစ်အတွက် အသက်တစ်ခု ပေးလှူလဲလှယ်ခြင်းရဲ့ သင်္ကေတဖြစ်ပါတယ်။

ဂျူးလူမျိုးတွေဟာ ပြည်နှင်ဒဏ်ခံရပြီးနောက် ဣသရေလနိုင်ငံကို ပြန်သွားတဲ့အခါ ပရောဖက်တွေဟာ လူတွေကို ဘုရားသခင်ကို စတင်ကိုးကွယ်ပြီး သူ့ပညတ်တော်အားလုံးကို တစ်ဖန်နာခံဖို့ တိုက်တွန်းခဲ့တယ်လို့ ကျွန်ုပ်တို့ပြောခဲ့ပါတယ်။

ကြည့်ရတာ ဂျူးလူမျိုးတွေ (အနည်းဆုံး ဣသရေလနိုင်ငံကို ပြန်လာသူအနည်းငယ်) ဟာ နောက်ဆုံးမှာ ဘုရားသခင်ဟာ ရုပ်တုကိုးကွယ်မှုနှင့် သူ့စကားမနာခံမှုကို သည်းခံမှာမဟုတ်ကြောင်း သင်ခန်းစာကို ရသွားခဲ့ပုံပေါက်ပါတယ်။ ဘာသာရေးခေါင်းဆောင်မှုရဲ့ သဘာဝအကျိုးဆက်တစ်ခုအနေနဲ့ ဂျူးတွေကို အုပ်စိုးဖို့ ထမြောက်လာတဲ့ ဂျူးယဇ်ပုရောဟိတ်ကြီးတွေဟာ ဘုရားသခင်အပေါ် သစ္စာရှိဖို့ ဆုံးဖြတ်ထားတဲ့ လူ့အဖွဲ့အစည်းကို ဖန်တီးပေးခဲ့ပါတယ်၊ ပြင်ပယဉ်ကျေးမှုတွေရဲ့ လွှမ်းမိုးကိုခံရဖို့ သူတို့ကိုယ်သူတို့ ခွင့်မပြုဘဲ ဘုရားသခင်ရဲ့ ပညတ်တော်အားလုံးက စာလုံးတစ်လုံးစီကို နာခံဖို့ အတတ်နိုင်ဆုံး ကြိုးစားခဲ့ကြပါတယ်။ ဒီလူ့အဖွဲ့အစည်းထဲမှာ မေရှိယဖြစ်တဲ့ သခင်ယေရှုကို မွေးဖွားခဲ့တာဖြစ်ပါတယ်။

ပဋိညာဉ်ဟောင်းအရ ဘုရားသခင်ဟာ သူ့ပညတ်တော်တွေကို နာခံသူတွေအတွက် ကျန်းမာရေးကောင်းမွန်ပြီး စည်းစိမ်ချမ်းသာကြွယ်၀စေဖို့ ကတိပြုခဲ့ပါတယ်။ ဣသရေလနိုင်ငံတော်ဟာ ဘုရားသခင်ကို ယုံကြည်ခဲ့တဲ့အချိန်က ခွန်အားကြီးပြီး ချမ်းသာကြွယ်ဝခဲ့ပါတယ်။ ဣသရေလနိုင်ငံတော်ကို ပြန်လာတဲ့ ဂျူးလူမျိုးတွေ မသိခဲ့တဲ့အရာကတော့ ဣသရေလနိုင်ငံ ကျဆုံးပြီးနောက်မှာ ဒီပဋိညာဉ်ဟောင်းက အသက်မဝင်တော့ကြောင်း ဖြစ်ပါတယ်။

ဓမ္မဟောင်းကျမ်း၏ ကြီးမြတ်သော အမျိုးသားများနှင့် အမျိုးသမီးများ

ကျွန်ုပ်တို့ဟာ ကာလရှည်ကြီးတစ်ခုမှာ ဖြစ်ပျက်ခဲ့တာတွေကို စာမျက်နှာနည်းနည်းလေးနဲ့ ပြောဆိုခဲ့ပေမဲ့ သမ္မာကျမ်းစာမှာ ဘုရားသခင်ရဲ့ ကြီးမြတ်တဲ့ အမျိုးသားတွေ၊ အမျိုးသမီးတွေအကြောင်းရေးထားတဲ့ ဇာတ်လမ်းတွေ အပြည့်ရှိပါတယ်။ သူတို့အကြောင်း သင်သိသင့်ပါတယ်။ စဖတ်ဖို့အတွက် အောက်မှာစာရင်းဇယားတစ်ခု ပေးထားပါတယ်၊ သမ္မာကျမ်းစာကို သင်စဖတ်တဲ့အခါ ဒီစာရင်းထဲသွင်းနိုင်တဲ့ တခြားသူများစွာကို သင်တွေ့ရှိမှာ အသေအချာဖြစ်ပါတယ်။ အောက်မှာပေးထားတဲ့ စာရင်းတွေကနေ စဖတ်ကြည့်ပါ၊ အဲ့လိုနဲ့ အချိန်ကြာလာတဲ့အခါ ဆက်ဖတ်ရင်းဖတ်ရင်း သင့်ကိုယ်ပိုင် "ကျမ်းစာရှိ ကြီးမြတ်သော ပုဂ္ဂိုလ်များ" စာရင်းကို ပြုစုနိုင်မှာဖြစ်ပါတယ်။ အဲ့ပုဂ္ဂိုလ်တွေကို တွေ့တဲ့အခါ အခန်းကြီးနဲ့ အခန်းငယ်ကို သေချာချမှတ်ထားပါ၊ ဒါမှ သင်ပြန်ဖတ်ချင်တဲ့အချိန်တိုင်း အလွယ်တကူ ရှာဖွေနိုင်မှာဖြစ်ပါတယ်။

စလိုက်ကြစို့။

ရှေ့ဆက်မဖတ်ခင်မှာ ဒီအချိန်ဟာ အပေါ်က ကျမ်းပိုဒ်တချို့ ဒါမှမဟုတ် ဒီအထိ ကိုးကားခဲ့တဲ့ ကျမ်းပိုဒ်တချို့ကို ဖတ်ဖို့ အချိန်ကောင်းတစ်ခုဖြစ်ပါတယ်။ "အခန်းကြီးနှင့် အခန်းငယ်" ကိုးကားချက်တွေကို သမ္မာကျမ်းစာမှာ ရှာဖို့ အလေ့အကျင့်ကောင်းတစ်ခု ဖြစ်ပါတယ်။